PUNTUEUS BEHATOKIA
PUNTUEUS BEHATOKIAK INTERNETEN EUSKARAK DUEN EGOERA AZTERTZEA DU HELBURU, BAITA .EUS DOMEINUAREN EGOERA ETA BILAKAERA AZTERTZEA ERE. AZTERKETA HONI ESKER EUSKARA INGURUNE DIGITALEAN INDARTZEKO BEHAR DIREN ESTRATEGIA ETA POLITIKAK SUSTATZEKO BEHARREZKO DEN OINARRIA EZARTZEN DA.
.EUS DOMEINUA 2023
PUNTUEUSen Behatokiak 2023an aztertutako datuei erreparatuta Euskal Herriko webguneen % 14k dauka edukiren bat euskaraz. Horrez gain, .EUS domeinua erabiltzen duten webguneen artean, % 69k euskarazko edukia argitaratzen du eta, beraz, .COM edo .ES bezalako domeinuekin alderatuz gero, euskararen presentzia askoz handiagoa dela ikus daiteke.
.EUS domeinuaren bilakaerari dagokionez, 2023an .EUS domeinuak % 4ko hazkunde-tasa izan zuen, 14.786 domeinutara iritsiz. Domeinuen berritze-tasari dagokionez, % 87koa izan da 2023an, .EUS domeinuaren erabiltzaileen fidelizazio-maila altua bermatuz. Hau neurtzeko, kontuan izan behar da domeinuen merkatu globalean hazkunde-tasa % 2,6koa izan dela, eta berritze-tasa aldiz % 65koa, beraz, .EUSen datuak oso onak direla ondorioztatu daiteke.
GOOGLE BILAKETEK EUSKARA DISKRIMINATZEN DUTE
Behatokiak Interneten euskarak duen egoera ikertzea du helburu, baita .EUS domeinuaren egoera eta eboluzioa aztertzea ere. Horrez gain, Googlen bilaketa zerbitzuak euskara diskriminatzen duela pentsatzeko zantzurik badagoen aztertu da. PUNTUEUSek aztertutako laginean, Googlen bilaketa zerbitzuan euskara gazteleraren mesedetan diskriminatzen dela identifikatu da, eta, ondorioz, euskarak Interneten duen ikusgarritasuna galdu duela nabarmendu da.
Euskarazko Wikipediaren arduradunek ere antzeman dute Googlen algoritmoaren aldaketa. Bisita kopuru orokorraren joera goranzkoa izan arren jaitsiera neurtu dute hainbat alorretan.
Babesleak
